Kuba TikTok yaramamaye cyane ku isi hose, byatumye umwe mu bashinze isosiyete ikomokaho, ByteDance, aba umuntu ukize cyane mu Bushinwa .
Dukurikije urutonde rw’abakire rwakozwe n’Ikigo cy’Ubushakashatsi cya Hurun, Zhang Yiming ubu arabarirwa akayabo ka miliyari 49.3 z’amadorari (miliyoni 38 z’amapound) umutungo we ukaba wariyongereyeho hejuru ya 43% ugereranije no mu 2023.
Uyu mugabo w’imyaka 41 yeguye ku mirimo yari ashinzwe yo kuyobora iyi sosiyete mu 2021, ariko bivugwa ko afitemo imigabane 20% nk’uko iyi nkuru dukesha BBC ivuga.
TikTok yabaye imwe muri porogaramu zizwi cyane ku mbuga nkoranyambaga ku Isi, nubwo hari impungenge zikomeye ku bihugu bimwe na bimwe kubera isano ifitanye na Leta y’u Bushinwa.
Mu gihe ayo masosiyete yombi ashimangira ko yigenga kuri Guverinoma y’u Bushinwa, Amerika irashaka guhagarika TikTok muri Mutarama 2025 keretse ByteDance niramuka iyigurishije.
Nubwo muri Amerika ihanganye n’igitutu gikomeye, inyungu za ByteDance ku Isi ziyongereyeho 60% umwaka ushize, bituma umutungo wa Zhang Yiming wiyongera.
Umuyobozi wa Hurun Research Institute, Rupert Hoogewerf, yagize ati: “Zhang Yiming ni uwa mbere (ukize) mushya wa 18 tugize mu Bushinwa mu myaka 26 gusa.”
"Ugereranije, Amerika ifite abantu bane ba mbere gusa: Bill Gates, Warren Buffett, Jeff Bezos na Elon Musk.
Ibi ngo biratanga ishusho y’imbaraga z’ubukungu bw’u Bushinwa.
