Mu mpera z'icyumweru dusoje nibwo hakinwaga imikino ya shampiyona yo ku munsi wa 28 wa shampiyona y'icyiciro cya mbere mu Bwongereza. 

Umukino warutegerejwe n'abenshi wabaye ku munsi w'ejo ku Cyumweru Saa kumi nimwe n'iminota 30 kuri Etihad Stadium aho ikipe ya Manchester City yari yakiriye Arsenal ariko birangira amakipe yombi anganyije 0-0.

Nyuma y'uyu mukino aganira na Sky Sports, umutoza wa Manchester City,Pep Guardiola yabajijwe niba Liverpool yaba ariyo ifite amahirwe menshi yo kwegukana igikombe maze avuga ko ariyo iyafite mu gihe bo ubu ibintu bitari mu biganza byabo.

Yagize ati "Liverpool iri ri kumwanya wa mbere. Niyo iyoboye urutonde rwa shampiyona, niko bimeze niyo ihabwa amahirwe menshi yo kwegukana igikombe. Haracyari imikino Icyenda kugira ngo turebe uko bizagenda".

Arsenal niyo ya 2 ihabwa amahirwe menshi yo kwegukana igikombe naho twebwe tuza ku mwanya wa Gatatu. Umuntu wese uyoboye niwe uba uhabwa amahirwe menshi. Mbere byari mu biganza byacu ariko ubu ntabwo ariko bimeze".

Nyuma y'uko ikipe ya Liverpool itsinze Brighton ku munsi w'ejo ibitego 2-1 yahise ifata umwanya wa mbere n'amanota 67 aho irusha Arsenal ya 2 amanota 65 naho Manchester City yo ikaba iri kumwanya wa 3 n'amanota 64.

Imikino aya makipe yombi agiye gukurikizaho,ku wa Gatatu Manchester City izakina na Aston Villa naho Arsenal ikine na Brighton mi gihe Liverpool izahita ikina na Sheffield United bukeye bwaho ku wa Kane.

Pep Guardiola uvuga ko Liverpool ariyo ifite amahirwe menshi yo kwegukana Premier League naho ubu ibintu bikaba bitari mu maboko yabo.