Tunisia: Perezida Saied yirukanye Minisitiri w’Intebe Hachani mu gihe amatora yegereje
Tunisia: Perezida Saied yirukanye Minisitiri w’Intebe Hachani mu gihe amatora yegereje
Perezida wa Tunisia, Kais Saied, yirukanye Minisitiri w’Intebe, Ahmed Hachani, maze ashyiraho Minisitiri w’imibereho myiza y’abaturage, Kamel Maddouri, nk’umusimbura, nk’uko Perezida wa Tunisia yabitangaje mu ijoro ryo kuri uyu wa Gatatu nk’uko tubikesha Reuters.
Muri Kanama umwaka ushize, Hachani yagizwe Minisitiri w’Intebe wa Tunisia. Amasaha make mbere y’uko yirukanwa, Hachani mu butumwa bwa videwo yavuze ko guverinoma imaze gutera imbere ku bibazo byinshi, nubwo hari ibibazo byugarije Isi yose, harimo no kubonera igihugu ibiribwa n’ingufu gikeneye.
Kwirukanwa ariko bije mu gihe abaturage batishimiye ikibazo cy’amazi n’amashanyarazi gikunze kugaragara mu bice byinshi by’igihugu. Mu gihe guverinoma ivuga ko Tunisia ifite ikibazo cy’amapfa akomeje gutuma gahunda yo kwishyiriraho ibiciro igabanywa, Saied we abona ko kugabanuka kw’amazi ari umugambi mubisha mbere y’amatora ya perezida akavuga ko ingomero zuzuye.
Saied yatangaje ko yiyamamariza amatora y’umukuru w’igihugu yo mu Kwakira mu gihe abatavuga rumwe n’ubutegetsi, imiryango iharanira uburenganzira bwa muntu n’abakandida bamunenga gukumira no gutera ubwoba abo bahanganye mu rwego rwo guharura inzira yo gutsindira manda ya kabiri.
Ntabwo ari ubwa mbere Perezida wa Tunisia yirukanye mu buryo butunguranye Minisitiri w’Intebe kandi ntatange ibisobanuro. Muri Kanama 2023, Perezida Saied yari yirukanye Najla Bouden nta mpamvu atanze, maze amusimbuza Hachani nawe wirukanwe nta bisobanuro.
