Uwaguye mu cyobo cyacukuriwe kugirwa ubwiherero witwa Umurangamirwa bivugwa ko yari avuye mu rugo rwabayemo ibirori byo gusaba umugeni, mu gihe yatahaga agaca mu rugo rw’umugore wahoze ari umugore wa Nyirarume bamaze iminsi batandukanye.

Nyuma y’uko Umurangamirwa n’umwana w’imyaka ibiri yari ahetse bari bamaze kugwa mu cyobo kireshya na metero icumi, hitabajwe umugabo usanzwe akora akazi ko gucukura ubwiherero ariko nawe ubwo yamanukaga ahambiriye imigozi yacitse nawe abagwamo ariko agerageza no kubakura muri uwo mwobo.

Yagize ati" Murangamirwa yari ahetse umwana noneho ava hariya habereye ibirori agana hano mu rugo, ngiye Kumva numva kabyara ke kavugije induru ngo Muranga aguye muri tuwarete ( Toilette) ubwo nagize ubwoba nzi ko yapfuye. Bahamagaye umugabo ucukura amatuwarete araza mu gihe yamanukaga ngo abakuremo , imigozi yamanukiragaho iracika nawe agwamo ."

Nyuma y’uko uwaguye mu mwobo wari uhetse umwana akuwemo bombi bajyanwe ku bitaro bya Rwamagana ndetse amakuru avuga ko habaye igitangaza umwana ntabwo yakomeretse mu gihe nyina bivugwa ko yongeye gushobora kuvuga .

Nyirumuringa Daniel wahoze abana na Muhawenimana Grace bivugwa ko ubwo yagabanaga n’umugore umutungo utimukanwa bari bafite, yafashe igice cy’ubutaka cyarimo ubwiherero bakoreshaga arakigurisha, ubuyobozi bumutegeka kubaka ubwiherero busimbura ubwari aho yagurishije ariko amaze kubucukura abusiga atabwubatse ahubwo babutwikiriza imitumba .

Ubwo bwiherero bwacukujwe n’uwo mugabo witwa Nyirumuringa Daniel, utuye mu Mudugudu wa Bacyoro mu Kagari ka Sibagire, ubwo twahaheraga twasanze hari umuturage wahaye Muhawenimana Grace ibiti byasimbujwe imitumba yariho ubwo Umurangamirwa yagwagamo .

Twagerageje kuvugana na Nyirumuringa Daniel uvugwaho gucukura ubwiherero ntabwubake kandi yari yabisabwe ubwo yahabwaga igice cy’ubutaka bari batuyemo ariko ubwo twakoraga iyi nkuru twari tutarashobora kuvugana nawe .