Amakuru aturuka muri Repubulika Iharanira Demokarasi ya Congo, aravuga ko hongeye kubura imirwano hagati y’ingabo za Leta ya FARDC na M23.
Izi mpande zombi zaraye zihondaguranye ku gicamunsi cyo kuri uyu wa Gatatu taliki 14 Kanama 2024.
Ni imirwano yabereye mu gace ka kisharo gaherereye muri gurupema ya Binza, muri teritware ya Rutshuru mu Ntara ya Kivu y’Amajyaruguru.
Ni mu gihe hari hashize ibyumweru bitatu aka gace karigaruriwe n’umutwe wa m23.Isoko y’amakuru ivuga ko FARDC ariyo yagabye iki gitero mu rwego rwo gushaka kongera kukigarurira.
Ku ruhande rwa FARDC ngo ntibyabahiriye kuko M23 yabakubise inshuro ikanigarurira bimwe mu bikoresho by’izi ngabo za Leta.
Iyi gurupema ya Binza yagiye iberamo imirwano ikaze, hagati y’uyu mutwe wa M23 n’iri huriro ry’Ingabo zirwana ku ruhande rwa Leta ya Congo.
Ni mu gihe Amerika iherutse gutangaza agahenge hagati y’izi mpande zombi ariko gasa nk’aho katubahirijwe.
