RDC: Imfungwa zirenga 20 zimaze gupfira muri gereza mu kwezi kumwe gusa
Ishami ry’umuryango w’abibumbye ryita ku burenganzira bwa muntu (UNJHRO) ryashyize ahagaragara raporo yaryo yo muri Gicurasi 2024, rigaragaza ko hapfuye abantu 22 baguye mu muri gereza atandukanye mu kwezi kumwe.
Abapfuye biganje mu ntara za Kivu y’Amajyaruguru (11), Tanganyika (6), Ituri (3) na Kasaï-Hagati (2). Impamvu nyamukuru zitera urupfu zifitanye isano nimirire mibi, imiterere mibi yo gufungwa no kutita ku bagororwa barwaye.
Imiryango mpuzamahanga itandukanye ivuga ko ibintu muri gereza zo muri Kongo bikomeje gutera ubwoba, aho abantu benshi batorotse muri Gicurasi na Kamena batinya ko bashobora gupfira muri gereza bagahitamo ko aho kugwamo bakwicwa n’amasasu.
Ku ya 26 Kamena, byibuze imfungwa 20 zatorotse gereza ya Manono mu ntara ya Tanganyika. Nk’uko byatangajwe na Reagan Mahanya, perezida wa sosiyete sivile yo muri ako gace, yavuze ko abasivili 16 n’abasirikare 4 batsinze baciye mu rihumye abarinzi maze baratoroka.
Umuyobozi wa gereza ya Isiro, Oma Mbazi Stéphane yavuze ko impamvu gutoroka n’impfu bikomeje kwiyongera, biterwa n’inzara n’ubucucike. Muri iyi gereza, taliki 19 Kamena abagororwa batanu barapfuye, abandi batanu barakomereka bikabije naho 27 baratoroka.
Ku ya 27 Gicurasi, abagororwa 17 batorotse gereza nkuru ya Shabunda. Samy Kitambila, visi-perezida wa sosiyete sivile mu majyepfo ya Kivu, yemeje ko mu bahunze harimo abantu bahamwe n’icyaha cyo gufata ku ngufu.
