RDC: Bagiye kwakira inkingo za mbere z’indwara y’Ubushita bw’Inkende
Minisitiri w’ubuzima muri Repubulika ya Demokarasi ya Congo yatangaje ko icyo gihugu kigiye kwakira inkingo z’indwara y’ubushita bw’inkende.
Repubulika ya Demokarasi ya Congo itegereje inkingo za mbere z’indwara y’ubushita bw’inkende kuri uyu wa Kane, icyiciro cya kabiri cyazo kikazahagera kuwa gatandatu w’iki cyumweru.
Ibi byatangajwe n’umukuru w’itsinda rishinzwe kurwanya iyo ndwara, Cris Kacita.
Ishami ry’umuryango w’Abibumbye ryita ku buzima OMS, mu kwezi gushize ryatangaje ko iyi ndwara yatangiriye muri Repubulika ya Demokarasi ya Congo ari icyorezo gihangayikishije Isi, ariko uburyo bwo kuyikumira bwahuye n’imbogamizi zishingiye ku ibura ry’inkingo.
Umukuru w’itsinda rishinzwe kurwanya iyo ndwara ntiyatangaje ingano y’inkingo Repubulika ya Demokarasi ya Congo iteganya kwakira kuri iyo minsi yombi nk’uko tubikesha VOA.
Muri iki gihugu cya Repubulika ya Demokarasi ya Congo abagera ku 19,710 bamaze kwandura iyi ndwara kuva yahagaragara nkuko bitangazwa na minisiteri y’ubuzima yaho.
