Rafael York yavuye mu mwiherero w’Amavubi igitaraganya ahita asubira muri Sweden
Rafael York ntazakina umukino wa Lesotho, ni nyuma yo kugirira imvune ku mukino wa Benin wabaye mu ijoro ryakeye.
Uyu mukinnyi wa Gefle IF, ni umwe mu bakinnyi bari bitabajwe n’umutoza Frank Spittler mu mikino y’umunsi wa 3 n’uwa 4 w’itsinda C ryo gushaka itike y’igikombe cy’Isi cya 2026.
York akaba yari yabanje mu kibuga ku mukino w’ejo wo Amavubi yaraye atsinzwemo na Benin 1-0. Yavuyemo igice cya kabiri kigitangira asimbuwe na Samuel Gueulette.
Akaba atari bukomezanye n’abandi berekeza muri Afurika y’Epfo aho Amavubi azakinira na Lesotho, FERWAFA ikaba yavuze ko yagize ikibazo cy’inyama yo mu itako yakwedutse "Hamstring".
Yagize iti "kubera imvune ya ’Hamstring’, umukinnyi w’Amavubi, Rafael York yavuye mu mwiherero kugira ngo akomeze kwivuza neza ari mu rugo. Tumwifurije gukira vuba."
Rafael York asubiye muri Sweden mu gihe Amavubi yo muri iri joro agomba kwerekeza muri Afurika y’Epfo aho azakina na Lesotho tariki ya 11 Kamena 2024, ni mu mukino w’umunsi wa 4 w’itsinda C.
