Nubwo iyi myigaragambyo yari yabujijwe ku mugaragaro, ishyaka rya Chadema ritavuga rumwe n’ubutegetsi ryari ryarahiye ko rizakora imyigaragambyo kubera gushimuta no kwica abayoboke baryo rivuga ko bikorwa n’inzego z’umutekano.

Chadema yavuze ko umuyobozi wayo, Freeman Mbowe n’umwungirije, Tundu Lissu, bombi batawe muri yombi kuri uyu wa Mbere, mu gihe abapolisi bashinzwe kurwanya imyigarambyo bari bashyizwe mu turere tw’ingenzi two mu mujyi kugira ngo bayikumire.

Mbowe yabwiye abamushyigikiye mbere yo gutambikanwa na polisi, nk’uko bigaragara ku mashusho yasangijwe n’ishyaka ku rubuga rwa interineti, Mbowe yabwiye abamushyigikiye ati: "Imyigaragambyo ni uburenganzira bwacu duhabwa n’itegeko nshinga kandi dutangazwa n’imbaraga zikoreshwa n’abapolisi mu gutera ubwoba abantu no guhungabanya umudendezo wacu."

Chadema irashinja guverinoma ya Perezida Samia Suluhu Hassan kongera kuyobora igihugu mu mayeri yo gukandamiza abatavuga rumwe n’ubutegetsi nk’uwamubanjirije, John Magufuli nk’uko iyi nkuru dukesha VOA ivuga.

Perezida Suluhu Hassan yatangiye imirimo nyuma y’urupfu rutunguranye rwa Magufuli muri Werurwe 2021 kandi asa nk’ugaragaraza ubushake bwo guha abanenga leta n’itangazamakuru kwishyira ukizana.

Ariko Chadema irashinja abashinzwe umutekano kuba inyuma y’ibura ry’abayoboke bayo benshi ndetse n’iyicwa rya Ali Mohamed Kibao, wari umunyamabanga mukuru waryo, wasanzwe yapfuye mu ntangiriro z’uku kwezi.

Polisi kandi yahagaritse imyigaragambyo y’urubyiruko rw’ishyaka muri Kanama, ifata abayobozi bayo benshi barimo Mbowe na Lissu.

Imiryango iharanira uburenganzira bwa muntu hamwe na guverinoma z’iburengerazuba, harimo na Leta Zunze Ubumwe za Amerika, bagaragaje impungenge zo kutorohera abatavuga rumwe n’ubutegetsi mbere y’amatora y’inzego z’ibanze mu Gushyingo n’amatora rusange mu mpera za 2025.

Lissu, umunyamurwango utavuga rumwe n’ubutegetsi, yatawe muri yombi inshuro zitabarika kandi yakomerekejwe n’amasasu menshi mu gushaka kumwica mu 2017.