Pasiteri w'imyaka 56 yafunzwe nyuma yo gusambanya umwana w'umukobwa w'imyaka 4
Muri Leta ya Anambra, muri Nigeria, umupasiteri witwa Emeka Mkama w’imyaka 56 yatawe muri yombi akekwaho gusambanya umwana w’umukobwa w’imyaka ine inshuro nyinshi mu gace ka Obosi, Idemili North.
Ibi byabaye ku wa 24 Ukuboza 2024, ariko amakuru yashyizwe ahabona ku wa 17 Gashyantare 2025 ubwo byagezwaga kuri Komiseri w’Ubuzima muri Leta ya Anambra, Dr Afam Obidike na Stanley Nkwoka uyobora aka karere.
Amakuru atangazwa na n’ikinyamakuru Punch avuga ko umukozi w’Ikigo Nderabuzima cya Model Primary Health Centre, Obosi ari we wamenyesheje inzego z’ubuzima kuri iki kibazo nyuma y’uko umwana yari amaze iminsi arembeye mu rugo batigeze bamuvuza uko bikwiye.
Pasiteri Emeka Mkama ukomoka muri Leta ya Ebonyi bivugwa ko ari umushumba w’itorero Jesus Build the Church Mission rikorera muri Obosi.
Umwe mu bagize umuryango w’uyu mwana utashatse ko izina rye ritangazwa, yavuze ko kuva ibi byabaho umwana atigeze amererwa neza ariko umuryango we waracecetse ntihagira ubimenyesha inzego z’umutekano.
Iyo nkuru ikomeza ivuga ko umwana yavurishwaga imiti gakondo, ariko ubuzima bwe bukomeza kuba bubi, bituma nyina amujyana ku kigo nderabuzima ari na ho habonekeye ibimenyetso bishinja uwo mupasiteri.
Nyuma y’iperereza ryakozwe, bivugwa ko ukekwaho icyaha ashobora kurekurwa vuba niba nta cyemezo cy’amategeko gifashwe vuba na bwangu.
