Nguko uko Rayon Sports yitwaye mu mukino bikarangira yegukanye igikombe cya shampiyona (Amafoto)
Nguko uko Rayon Sports yitwaye mu mukino bikarangira yegukanye igikombe cya shampiyona (Amafoto)
Rayon Sports yashyikirijwe igikombe cya Shampiyona mu bagore nyuma yo gutsinda Fatima ibitego 5-0 mu mukino wabereye ku kibuga cyo mu Nzove.
Wari umukino w’ibirori by’iyi kipe imaze icyumweru itwaye igikombe cya shampiyona.
Ku munota wa 18, Umunya-Malawi, Mary Chavinda, yari amaze gutsinda ibitego bibiri mu gihe Nibagwile Libellée kuwa 34 Uwitonze na Nyirarukunda ku munota wa 43 batumye amakipe ajya mu karuhuko ari ibitego 4-0.
Mu gice cya kabiri, Mukandayisenga Jeanine ku munota wa 63 yaje gutsinda agashinguracumu kashimangiye ko ari we uyoboye abandi ba rutahizamu mu Rwanda muri ruhago y’abagore ari nako umukino usozwa ari ibitego 5-0.
Nyuma y’umukino, Rayon Sports yaje gushyikirizwa igikombe cya shampiyona yegukanye ku nshuro ya mbere mu mateka yayo, itwaye nyuma yo kuzamuka mu cyiciro cya mbere muri uyu mwaka.
Umuyobozi w’ikipe ya Rayon Sports, Jean Fidèle Uwayezu, yatangaje ko bishimiye kwegukana iki gikombe kuko zari intego zabo ubwo bashingaga ikipe y’abagore.
Ku gahimbazamusyi gasanzwe gahabwa iyi kipe, yongeyeho miliyoni y’amafaranga y’u Rwanda bazashyikirizwa mu cyumweru gitaha.
Habyarimana Marcel wari uhagarariye Perezida wa Ferwafa, yavuze ko bishimishije kubona umupira w’amaguru w’abagore umaze gutera imbere aho yijeje abakunzi b’uyu mukino ko umwaka utaha bazakora ibishoboka ngo ikibazo cy’ibibuga cyakunze kwibazwaho gikemuke.
Rayon Sports nyuma yo kwegukana shampiyona ni yo izahagarira u Rwanda mu mikino ya CAF Champions League mu bagore, aho izatangira ishakira itike muri aka karere ka CECAFA izabera muri Ethiopia.
