Iyi mikino irakomeza kuri uyu wa Kabiri, tariki 16 Mata 2024 hakinwa iyo kwishyura, iteganyijwemo uwo Barcelona izakira Paris Saint Germain saa 21:00.

Umukino ubanza iyi kipe yo muri Espagne yatsindiye i Paris ibitego 3-2, ariko indi yizeye kuyigaranzura ikayisezerera ikagera muri ½ imaze kugeramo inshuro eshatu ziheruka zikurikiranya.

Mu kiganiro n’itangazamakuru mbere y’uyu mukino, Umutoza wa PSG, Luis Enrique yatangaje ko biteguye gusezerera Barcelona.

Yagize ati “ Ntabwo PSG irava inyuma ngo isezerere ikipe mu mukino wo kwishyura ariko ku wa kabiri ni wo munsi wo kubikora. Dufite ikipe nziza y’abakinnyi batiyemera.”

Ku rundi ruhande Barcelona inyotewe gusubira mu ruhando rw’abagabo igera muri ½ iherukamo mu myaka itanu ishize.

Umutoza wa Barcelona, Xavi Hernandez yatangaje ko batazorohera PSG.

Ati “Ntabwo tuzagendera ku mukino ubanza. PSG tuzayima umupira dutsinde umukino.”

Iyi kipe izakina idafite Andreas Christensen na Sergio Roberto batemerewe gukina kubera amakarita, mu gihe PSG izaba yagaruye myugariro Achraf Hakimi.

Mu nshuro 14 zimaze guhuza amakipe yombi, Barcelona yatsinzemo esheshatu, itsindwa enye, banganya izindi enye. Ni mu gihe kandi iyi kipe yakomeje mu kindi cyiciro igihe cyose yatsinze umukino ubanza wo hanze.

Undi mukino uteganyijwe kuri uyu wa Kabiri, ni uwo Borussia Dortmund izakiramo Atlético de Madrid. Umukino ubanza ikipe yo muri Espagne yatsinze umukino ku bitego 2-1.

PSG ifite icyizere cyo kwigaranzura Batcelona

Rurageretse hagati ya Manchester City na Real Madrid

Undi mukino utegerejwe cyane ni uwo Manchester City izakiramo Real Madrid ku wa Gatatu, tariki 17 Mata 2024 saa 21:00 kuri Etihad Stadium. Umukino ubanza amakipe yombi yari yanganyije ibitego 3-3.

Uyu ni umwe mu mikino ikomeye cyane mu bihe bya vuba ndetse Man City izaba ishaka uko yakora amateka yo gusezerera Real Madrid ku nshuro ya kabiri yikurikiranya kuko n’umwaka ushize yari yabikoze muri ½ ubwo yegukanaga iki gikombe ku nshuro ya mbere.

Uyu mukino kandi ubarirwa ibitego 4.6 ku mukino kuko muri itanu iheruka wabonetsemo 23. Muri iyo, imikino ibiri igitego cya mbere kiboneka mu minota ibiri ya mbere y’umukino, byumvikanisha imbaduko utangirana.

Ni ubwo bimeze bityo, Man City imaze gutsinda imikino yose (itatu) imaze kwakiramo Real Madrid mu rugo.

Iyi kipe y’i Madrid izakina idafite Aurélien Tchouaméni ufite amakarita atamwemerera gukina, ni mu gihe Rodrygo wayitsindiye ibitego bibiri mu mukino ubanza ashidikanywaho kubera imvune idakomeye yagize.

Ruracyageretse hagati ya Real Madrid na Man City

Arsenal yakabya inzozi?

Ikipe ya Arsenal ifite umusozi muremure wo guterera, ubwo izaba ihanganye na Bayern Munich mu mukino wo kwishyura uzaba ku wa Gatatu, tariki 17 Mata 2024 i Allianz Arena saa 21:00. Umukino ubanza wabereye kuri Emirates Stadium amakipe yombi yanganyije ibitego 2-2.

Arsenal ntikunze guhirwa no gusura Bayern Munich kuko imaze kuhatsindirwa inshuro eshatu, aho ebyiri iherukayo yatsinzwe ibitego 5-1.

Iyi kipe kandi imaze gutsinda Bayern inshuro imwe gusa muri esheshatu zahuje amakipe yombi. Icyo gihe hari mu 2013 gusa nabwo The Gunners yasezerewe ku gitego cyo hanze (3-3).

Umutoza wa Bayern Munich, Thomas Tuchel ni uwo kwitondera cyane kuko mu myaka ibiri ishize amaze kugeza PSG na Chelsea muri ½, mu gihe yabishobora no kuri Bayern Munich aziyongera kuri José Mourinho wabikoze mu makipe ane (FC Porto, Chelsea, Inter de Milan na Real Madrid).

Mu 2019 itsindwa na Liverpool nibwo Bayern Munich yananiwe gukomeza mu kindi cyiciro mu gihe itatsinzwe umukino ubanza. Iyi kipe iri gushaka uko yagera muri ½ cya UEFA Champions League ku nshuro ya 13, mu gihe ari iya gatatu kuri Arsenal iherukamo mu 2008/09.

Arsenal ifite akazi gakomeye ko kwikura imbere ya Bayern Munich