Imikino: Kera kabaye Gisagara Volleyball yabonye intsinzi mu Mikino Nyafurika
Gisagara VC yatsinze Mugher Cement Factory Sport Club yo muri Ethiopia amaseti 3-0, iba intsinzi ya mbere ibonye mu Mikino Nyafurika “CAVB Club Championship 2024” ikomeje kubera mu Misiri.
Iri rushanwa rihuza amakipe yabaye aya mbere iwayo rigeze mu mikino ya ¼, ni mu gihe andi makipe ari guhatanira imyanya.
Gisagara VC ni imwe mu makipe ahagarariye u Rwanda muri iri rushanwa ariko ryayigendekeye nabi bikomeye kuko, kuri iki Cyumweru, tariki 21 Mata 2024 aribwo yabonye intsinzi ya mbere.
Hari mu mukino wo guhatanira imyanya hagati ya 17 na 20. Iyi kipe yo mu Karere ka Gisagara ntabwo yagowe cyane kuko yawuyoboye kuva utangiye kugeza urangiye.
Iseti ya mbere Gisagara yayegukanye bigoye itsinze amanota 29 kuri 27 ya MCF.
Iyi kipe yo mu Rwanda yasubiranye imbaraga zikomeye mu iseti ya kabiri maze iyitsinda ku manota 25 kuri 16. Iya gatatu yari iyo gushimangira intsinzi yayegukanye ku manota 25 kuri 14.
Muri rusange, umukino warangiye Gisagara VC yatsinze Mugher Cement Factory Sport Club amaseti 3-0 (29-27, 25-16 na 25-14).
Iyi kipe izasubira mu kibuga ku wa Kabiri tariki 23 Mata 2024 ikina na Rukinzo VC y’i Burundi mu mukino wo guhatanira umwanya wa 17 na 18.
Indi kipe ihagarariye u Rwanda ni Police VC yo ikomeje kwitwara neza. Iyi kipe ya Polisi y’Igihugu iraza gukina na Al Ahly mu mukino wa ¼ uteganyijwe kuri iki Cyumweru, saa 20:00.
