Imikino: Ikipe ya Al-Hilal yaciye agahigo ko gutsinda imikino myinshi yikurikiranya ku Isi
Imikino: Ikipe ya Al-Hilal yaciye agahigo ko gutsinda imikino myinshi yikurikiranya ku Isi
Ikipe ya Al-Hilal yo muri Arabie Saoudite yabaye ikipe yo mu cyiciro cya mbere yaciye agahigo ku Isi nyuma yo gutsinda imikino 28 yikurikiranya.
Intsinzi y’ibitego 2-0 yabonye kuri Al-Ittihad muri Champions League ya Asia, yari iya 28 yikurikiranya kuri Al-Hilal ifite ibikombe byinshi muri Arabie Saoudite.
Ni amateka mashya Al-Hilal yanditse kuko yatambutse ku ntsinzi 27 zabonywe n’Ikipe ya The New Saints yo muri Pays de Galles mu 2016.
Al-Hilal yatsinze buri mukino yakinnye kuva inganyije na Damac ku wa 21 Nzeri.
Iyi kipe ikinamo abakinnyi barimo Aleksandar Mitrović wanyuze muri Fulham, Ruben Neves wakinnye muri Wolves na Neymar wakiniye Paris Saint-Germain.
Gusa, uyu rutahizamu w’Umunya-Brésil wavuye mu Bufaransa, amaze igihe adakina nyuma yo kuvunika mu Ukwakira.
Al-Hilal itozwa na Jorge Jesus watoje Benfica na Flamengo, irusha amanota 12 Al-Nassr ikinamo Cristiano Ronaldo, muri Saudi Pro League.
Mitrović yatsinze ibitego 26 muri 81 Al-Hilal yinjije muri iyi mikino yose. Harimo 16 bya Shampiyona, bitatu mu gikombe cy’igihugu n’ibindi icyenda muri Champions League ya Asia.
Intsinzi yo ku wa Kabiri yatumye Al-Hilal igera muri 1/2 cya Champions League ku giteranyo cy’ibitego 4-0 mu mikino ibiri.
