Igisirikare cya FARDC cyihakanye ibirego byumutwe wa M23 bibashinja kubavogera
Ubutegetsi Bw’igisirikare (FARDC) bwahakanye ibirego byazamuwe n’umutwe w’inyeshyamba wa m23 bubashinja kubavogerera ikirere
FARDC yarahiye irirenga ivuga ko nta ndege yabo yigeze igera mu kirere cya M23 nk’uko yo ikomeje kubibashinja
Mu itangazo yasohoye ku Cyumweru, M23 yavuze ko "indege y’ubutasi bwa Kinshasa yavogereye ikirere cyacu muri iki gitondo cyo ku Cyumweru tariki ya 25 Kanama 2024", ivuga ko ibyabaye bigize "kwica agahenge ndetse n’ubushotoranyi butemewe".
Umuvugizi wa FARDC mu ntara ya Kivu y’Amajyaruguru, Lt Col Guillaume-Ndjike Kaiko mu itangazo yasohoye yavuze ko hashize amasaha 48 hari ikibazo cy’ikirere, ati: "nta ndege ya FARDC cyangwa abafatanyabikorwa bayo yigeze igera mu kirere cya Kivu y’Amajyaruguru".
FARDC ivuga ko M23 yahisemo kuyishinja kuvogera ikirere cyayo mu rwego rwo guhuma amaso abantu ndetse no kuyishakaho impamvu ishimangira ibitero ivuga ko uriya mutwe wagabye ku birindiro byayo biherereye Kikubo muri Teritwari ya Lubero.
Muri aka gace ku Cyumweru habereye imirwano ikomeye kuva mu gitondo cyo ku Cyumweru twaraye dusoje , ndetse buri ruhande rushinja urundi kuba ari rwo rwayitangije.
FARDC irigarama ibirego M23 iyishinja nyamara hari amakuru avuga ko kajugujugu yayo yagaragaye mu kirere cya Bunagana ku Cyumweru, iraswaho mbere yo guhunga amasasu igana muri Uganda.
