Mu Cyumweru gishize The Ben yabwiye abanyamakuru ko muri 2017 Bruce Melodie yagiye kumureba ngo bakorane indirimbo, gusa ntibyakunda ko bayikorana kubera ko yasanze uyu muhanzi uheruka gushyira hanze indirimbo yise ’Ni Forever’ yaratangiye shampiyona ya ’Playstation’ yari ahanganyemo na DJ Zizou Alpacino.

Ni The Ben waboneyeho kwisegura kuri Melodie ku bw’umushinga w’indirimbo yabo utarakunze.

Yagize ati: "Nahuye na Bruce Melodie mu 2017 azanywe n’inshuti yanjye yitwa Omar. Omar yari amaze iminsi ambwira ngo Bruce Melodie arashaka kungisha inama. Yaraje asanga njyewe na Zizou twamaze gutangira shampiyona, niba naramuhamagaye nkigira mu byanjye ambabarire".

Yunzemo ati: "Njyewe siniziho gusuzugura. Ubundi umuhanzi iyo mugiye gukorana indirimbo habaho gufata igihe gihagije. Ashobora kuba atarihanganye no kuba gahunda twahanye yaratinze. Ntabwo nshobora gusuzugura umuntu...Icyabaye si agasuzuguro. Bruce Melodie niba yarababaye musabye imbabazi".

Imikino ntabwo iza imbere y’imirimo

Bruce Melodie mu kiganiro yaraye ahaye itangazamakuru mbere y’uko yerekeza muri Leta Zunze Ubumwe za Amerika aho yitabiriye ubutumire bwa Televiziyo ya ABC News, yongeye kugaragaza ko The Ben atari umunyamwete, amugira inama y’uko atagomba gushyira imikino imbere y’akazi.

Ati: "Nk’umuntu mukuru ntabwo The Ben murusha imyaka, ariko ntabwo ntekereza ko burya imikino iza mbere y’imirimo. Rero nonaha n’ubwo ntigeze mvuga ko The Ben ari umunebwe, ariko si umunyamwete. Njyewe noneho ntabwo naterwa ishema ryo kuvuga ngo narakinnye hari kuba akazi".

Yunzemo ati: "Ni nayo mpamvu nagira ngo mutemo neza mugire inama anabyumve neza, burya akazi karabanza. Iyo umuntu adakora burya nta n’ubwo anahembwa, kandi gukena biva ku kuntu umuntu yitwaje umwanya afite n’uburyo yawukoresheje".

Ni Melodie wongeye gushimangira ko The Ben yigeze kumutumaho abantu be ndetse na we ubwe akanamuvugisha, gusa bikaza kurangira ntacyo bakoze.