Guinea: Umurambo wa Colonel Bilivogui wari umaze umwaka waraburiwe irengero wabonetse
Guinea: Umurambo wa Colonel Bilivogui wari umaze umwaka waraburiwe irengero wabonetse
Colonel Célestin Bilivogui, wari waraburiwe irengero nyuma yaho ashimuswe n'abasirikare ahantu hatazwi mu gihe kingana n'Umwaka wari ushyize, kuri uyu wagatatu umurambo we wabonetse uhita utwarwa mu buruhukiro bw'ibitaro bya Ignace Deen mu murwa mukuru Conakry.
Umugore wa Nyakwigendera Colonel Célestin Bilivogui, witwa Laouratou Bangoura, yabwiye itangazamakuru rya Guinea, ko ku wagatatu tariki ya 25 Nzeri 2024. Yahamagawe kuri Telefone na Nomero atazi, maze asabwa kujya ku kicaro cya Gisirikare Almamy Samory Touré.
Nyuma yokugera kuri icyo kicaro, yasabwe n'abasirikare kujya kubitaro bya Ignace Deen, kureba niba umurambo uri muri ibyo bitaro ari uw'umugabo we.
Tariki ya 8 Ukuboza 2023, nibwo Colonel Célestin Bilivogui, yashimuswe nyuma y'iminsi inne yirukanwe mu gisirikare azira kuba Mousaa Dadis Camara na Claude Pivi baratorotse Gereza nkuru ya Conakry aho bari bafungiye.
Kuva icyo gihe ubwo Colonel Bilivogui yashimutwaga, uyu mugore wa Nyakwigendera yari atarabona ubutabera.
