France: Abapilote 2 b’indege z’indwanyi bapfuye nyuma yo kugongana n’indi mu kirere
Abapilote babiri b’indege z’indwanyi z’Abafaransa bapfuye nyuma y’uko indege yabo yo mu bwoko bwa Rafale igonganye n’indi mu kirere zikagwa mu majyaruguru y’uburasirazuba bw’u Bufaransa nk’uko Igisirikare cy’u Bufaransa kibitangaza.
Impanuka z’izi ndege z’indwanyi z’Abafaransa zigenda ku muvuduko ukubye uw’ijwi inshuro runaka ntabwo zisanzwe. Impanuka ebyiri gusa ziheruka, imwe yabaye muri 2007 indi mu 2009, kuva izi ndege zatangira gukoreshwa mu 2001.
Umupilote w’indi ndege yabashije gusohokamo amahoro ariko akomereka byoroheje nk’uko iyi nkuru dukesha Euronews ivuga.
Minisiteri y’ingabo y’u Bufaransa mu itangazo ryayo yatangaje ko indege zombi zagonganye ku wa Gatatu mu gihe cy’imyitozo yaberaga mu karere ka Vosges hafi y’umujyi wa Colombey-les-Belles.
Ivuga ko abapilote bapfuye ari umwarimu n’umunyeshuri bari mu butumwa bw’amahugurwa.
Iperereza rya gisirikare n’ubucamanza ryatangiye ku mamvu zateye impanuka.
Umupilote wa Rafale umwe yabonetse ari muzima nyuma y’impanuka, ariko byatwaye amasaha menshi yo gushakishwa n’abashinzwe umutekano mu karere k’ishyamba kugira ngo babone abaderevu bombi b’indi ndege.
Perezida w’u Bufaransa, Emmanuel Macron, yihanganishije imiryango yabo ku mbuga nkoranyambaga X.
Macron yagize ati: "Twamenye n’agahinda urupfu rwa Capt. Sébastien Mabire na Lieutenant Matthis Laurens mu mpanuka y’indege mu butumwa bw’amahugurwa ya Rafale."
Yongeyeho ati: "Igihugu gisangiye akababaro n’imiryango yabo n’abavandimwe mu gisirikare kuri Air Base 113 muri Saint-Dizier."
U Bufaransa bwaguze indege z’intambara za Rafale zigera kuri 230, biteganijwe ko 42 zizakorwa guhera mu 2027. Abandi bakoresha izi ndege harimo u Bugereki, Croatia, Misiri, u Buhinde na UAE.
