Euro 2024 Yahumuye!: Hamenyekanye Impamvu ikomeye Didier Deschamps yongeye guhamagara N’Golo Kanté
Euro 2024 Yahumuye!: Hamenyekanye Impamvu ikomeye Didier Deschamps yongeye guhamagara N’Golo Kanté
Umutoza w’Ikipe y’Igihugu y’u Bufaransa, Didier Deschamps yahamagaye abakinnyi 25 azifashisha muri Euro 2024 iteganyijwe mu mpeshyi hagaragaramo N’Golo Kanté ataherukaga guhamagara.
Urutonde rw’abakinnyi b’u Bufaransa ruriho abanyezamu batatu, ba myugariro umunani, abakina hagati barindwi, mu gihe abakinnyi bataha izamu nabo ari barindwi.
Mu bakina hagati niho hagaragaye N’Golo Kanté watunguye benshi cyane ko yigeze gusezera muri iyi kipe y’igihugu avuga ako atazongera kuyikinira kubera impamvu ze bwite.
Gusa umutoza Didier Deschamps yashimangiye ko urwego ariho hari icyo ruzamufasha mu mikino iri imbere.
Yagize ati "Yakinnye [N’Golo Kanté] umwaka wose nubwo igihe yari muri Chelsea yari yugarijwe n’imvune. Aho ari gukinira muri Arabie Saoudite ari mu bihe byiza ndetse nizeye ko ari umwe mu bazatuma Ikipe y’Igihugu y’u Bufaransa ikomera.”
Tariki ya 21 Kamena 2023, ni bwo N’Golo Kanté w’imyaka 33 yemeye gusinya amasezerano muri Al-Ittihad yo mu Cyiciro cya Mbere muri Arabie Saoudite mu gihe yari ageze ku mpera y’amasezerano ye muri Chelsea.
Kanté akigera muri Al-Ittihad yakinnye umukino wa mbere ahita aba umukinnyi mwiza w’umukino ubwo yahuraga na Al-Wehda. Kuva icyo gihe yabonye umwanya uhagije wo gukina ndetse anabanza mu kibuga mu mikino yose.
Kuva yayigeramo amaze kuyitsindira ibitego bibiri harimo icyo yinjije ku mukino wa Al-Fateh, ikindi aheruka kugitsinda mu Ukuboza 2023 ubwo bahuraga na Auckland City.
Mu mikino 28 amaze gukina yose hamwe yagaragaye mu ikipe nziza y’icyumweru inshuro eshatu muri Saudi Pro League.
U Bufaransa buri mu Itsinda D aho buri kumwe na Pologne, u Buholandi na Australia.
Abandi bakinnyi u Bufaransa bwahamagaye
Abanyezamu: Alphonse Aréola (West Ham United), Mike Maignan (AC Milan), Brice Samba (Lens).
Ba myugariro: Jules Koundé (Barcelona), Jonathan Clauss (Marseille), Benjamin Pavard (Inter), Ibrahima Konaté (Liverpool), William Saliba (Arsenal), Dayot Upamecano (Bayern Munich), Theo Hernandez (AC Milan), Ferland Mendy (Real Madrid).
Abakina hagati: Eduardo Camavinga (Real Madrid), Youssouf Fofana (Monaco), Adrien Rabiot Juventus), Warren Zaire-Emery (PSG), Aurelien Tchouameni (Real Madrid), Antoine Griezmann (Atletico Madrid).
Ba rutahizamu: Bradley Barcola (PSG), Ousmane Dembele (PSG), Kinglsey Coman (Bayern Munich), Olivier Giroud (AC Milan), Randal Kolo Muani (PSG), Kylian Mbappe (PSG), Marcus Thuram (Inter).
