Inteko Ishinga Amategeko ya Amerika yemeje umushinga w’icyo gihugu wo kugirisha Turikiya indege z’intambara zo mu bwoko bwa F-16.
Ni nyuma y’iminsi mike Turikiya yemeye ko Suède yinjira mu Muryango w’Ubutabarane wa NATO.
Turikiya yari imaze igihe isaba Amerika kuyemerera ikagura indege nshya za F-16 ndetse no guhabwa ibikoresho byo gusana izo isanganywe zo muri ubwo bwoko, ariko Amerika ikabyanga.
RFI yatangaje ko indege nshya Amerika yemeye kugirisha muri Turikiya ari 40 ndetse n’ibikoresho 79 byo gusana izindi yari isanganywe zo muri ubwo bwoko.
Ambasaderi wa Leta Zunze Ubumwe za Amerika muri Turikiya, Jeff Flake yatangaje ko ari inkuru nziza iganisha umubano w’ibihugu byombi mu cyerecyezo cyiza.
Tariki 26 Mutarama 2024 nibwo Guverinoma ya Amerika yemeje kugurisha izo ndege kuri miliyari 23 z’amadolari, gusa bikabanza kwemezwa n’Inteko kandi Turikiya nayo ikemeza ko Suède yinjira muri NATO.
