Amakuru mashya kubasabye ubuhungiro mu gihugu cy'U Bwongereza harimo nabazoherezwa mu Rwanda
Amakuru mashya kubasabye ubuhungiro mu gihugu cy'U Bwongereza harimo nabazoherezwa mu Rwanda
Guverinoma nshya y’u Bwongereza irateganya gutangira gusubiza vuba abimukira bivugwa ko bagera ku bihumbi 90 barimo abagombaga koherezwa mu Rwanda, hashingiwe ku masezerano ibihugu byombi byagiranye muri Mata 2022.
Aba bimukira biganjemo abaturutse mu bihugu birimo amakimbirane nka Syria, Afghanistan, Sudani na Eritrea.
Amasezerano yavugaga ko abimukira binjiye mu Bwongereza bifashishijwe ubwato buto guhera muri Mutarama 2022, ari bo barebwa n’iyi gahunda.
Bitewe n’uko Guverinoma y’Aba-Conservateurs yarekuye ubutegetsi mu Bwongereza yateganyaga kubohereza byihuse, yari yarafashe icyemezo cyo gusubiza ubusabe bwabo bw’ubuhungiro mu gihe bari kuzaba barageze i Kigali.
Hashingiwe kuri iyi gahunda, umwimukira wari kuzahabwa ubuhungiro yari kwemererwa gusubira gutura mu Bwongereza, mu gihe utari kubuhabwa we yari kuzemererwa kuguma mu Rwanda cyangwa akajya mu kindi gihugu yifuza, cyemera kumwakira.
Nyuma y’amatora y’abadepite yabaye tariki ya 4 Nyakanga 2024, Guverinoma nshya iyobowe n’Ishyaka ry’Abakozi (Labour) iyobowe na Keir Stamer yafashe icyemezo cyo guhagarika iyi gahunda kuko ngo idashobora gukumira abimukira binjira mu Bwongereza mu buryo butemewe n’amategeko.
Kuri uyu wa 19 Nyakanga 2024, abo mu biro by’Umunyamabanga ushinzwe Umutekano w’imbere mu Bwongereza basobanuriye Urukiko Rukuru rwa Londres uko bateganya gusubiza ubusabe bw’aba bimukira.
Guverinoma kandi yamenyesheje urukiko ko iri gukorana n’abanyamategeko bunganira abimukira, hagamijwe gushaka ibisubizo by’ibibazo byabo.
Ben Nelson uri mu banyamategeko bunganira aba bimukira, yagaragaje ko iki cyemezo cya Guverinoma y’u Bwongereza ari intambwe nziza, kuko kizafashe abakiliya babo kubaho ntacyo bishisha.
Guverinoma iherutse kwegura yari iyobowe na Rishi Sunak yari yaramenyesheje Urukiko Rukuru ko abimukira ba mbere barebwa n’iyi gahunda bazoherezwa mu Rwanda tariki ya 24 Nyakanga 2024.
