Amakipe y’Igihugu ya Table Tennis mu Bagabo n’Abagore yerekeje i Kampala muri Uganda, mu irushanwa ‘Eastern Regional Senior Championship 2024’ riteganyijwe tariki 22 kugeza 24 Mata 2024.
Aya makipe yombi yahagurutse ku Kibuga Mpuzamahanga cy’Indege cya Kigali mu ijoro ryo ku wa Gatandatu, tariki 20 Mata 2024.
Mu bagabo, iyi kipe igizwe na Kapiteni Ishimwe François Regis, Masengesho Patrick, Hahirwabasenga Didier, Nshimirwa Blaise na Nzosaba Didier.
Ni mu gihe iy’abagore igizwe na Tumukunde Hervine, Uwase Diane, Hirwa Kelia Chantal na Twizerane Mbabazi Regine.
Kapiteni w’Ikipe y’Igihugu y’Abagabo, Ishimwe François Regis yatangaje ko bagize imyiteguro myiza bityo bizeye kuzegukana imidali.
Ati “Twagize imyiteguro myiza bityo rero ndumva tuzabasha kwegukana imidali ari nako tunitegura neza Igikombe cya Afurika tuzakira mu kwezi gutaha.”
Muri rusange iri rushanwa rizitabirwa n’ibihugu nka Uganda, u Rwanda, Kenya na Ethiopia. Kuri iyi nshuro kandi hanatumiwe Madagascar ndetse na Mauritius.
U Rwanda kandi ruzakoresha iri rushanwa mu kwitegura neza Igikombe cya Afurika ruzakira tariki 12 kugeza 18 Gicurasi 2024 muri BK Arena. Kizanatanga kandi itike y’Imikino Olempike izabera i Paris mu Bufaransa kuya 26 Nyakanga kugeza 11 Kanama 2024.
