Igikombe cya Afurika kizwi nka AFCON kuri uyu wa 11 Gashyantare cyashyirwagaho akadomo ubwo ikipe ya Nigeria yacakiranaga na ekipe ya Cote D’Ivoire, umukino waje kurangira Cote D’Ivoire itsinze ibitego 2 kuri kimwe cya Nigeria.
Ni mukino wa nyuma wabereye kuri Sitade yitiriwe Alassane Ouattara i Abidjan n'ubundi mu gihugu cya Côte D'Ivoire. Iyi kipe bitirira inzovu umuntu yavuga ko yapfuye ikazuka dore ko yabonye itike iyikura mu itsinda nk'ikipe yatsinzwe neza gusa birangiye ariyo yegukanye igikombe,gihita kiba icya 3 begukanye mu mateka.
Umukino urangiye ikipe y'igihugu ya Cote D'Ivoire yegukanye igikombe cy'Afurika cya 2023 itsinze Nigeria ibitego 2-1.
Mu mateka y'iki gikombe cy'Afurika cyakinwaga ku nshuro ya 34,kipe y'igihugu ya Côte D'Ivoire bita Inzovu igifite inshuro 2(icyo mu 1994 no muri 2013) mu gihe iya Nigeria yo bitirira Kagoma igifite inshuro 3(icyo mu 1984,1988 no 1990).
Mu mikino 8 iheruka guhuza aya makipe y'ibihugu byombi kuva muri 2006, ntabwo azi kunganya uko bisa kubera ko buri kipe yatsinze imikino 4 kuri 4.
Aya makipe ahuriye ku mukino wa nyuma,nyuma y'uko bari mu itsinda rimwe maze Nigeria igatsinda Côte D'Ivoire igitego 1-0 cya Kapiteni, William Troost-Ekong kuri penariti.
Muri iri tsinda A Nigeria niyo yazamutse iri yoboye n'amanota 7 mu gihe Côte D'Ivoire yo yari yazamutse nk'ikipe yatsinzwe neza.
Ibi byaviriyemo Umutoza Jean Louis Gasset kwirukanwa, ikipe ihabwa Emerse Faé wari wungirije, nyuma y’iminsi 19 gusa ahesha iki gihugu Igikombe cya Afurika cya gatatu nta wagihaga amahirwe.
Kapiteni w’Ikipe y’Igihugu ya Nigeria, William Troost-Ekong, ni we wabaye Umukinnyi Mwiza w’Irushanwa, Umunyezamu Mwiza yabaye Ronwen Williams w’Ikipe y’Igihugu ya Afurika y’Epfo.
Ni mu gihe Kapiteni w’Ikipe y’Igihugu ya Guinée Équatoriale, Emilio Nsue, yabaye umukinnyi watsinze ibitego byinshi, aho afite bitanu yatsinze mu mikino ine.
Umutoza w’Irushanwa yabaye Emerse Faé w’Ikipe y’Igihugu ya Côte d’Ivoire, Simon Adingra ukinira iyi kipe, aba umukinnyi muto w’irushanwa.
