Abanyarwanda basaga 300 bisanze ku rutonde rw’abimukira Amerika iteganya kwirukana bidatinze
Abanyarwanda basaga 300 bisanze ku rutonde rw’abimukira Amerika iteganya kwirukana bidatinze
Abanyarwanda babarirwa muri 338, bari ku rutonde rw’abimukira baba muri Leta Zunze Ubumwe za Amerika iki gihugu giteganya kwirukana ku butaka bwacyo.
Abimukira barenga 1,400,000 ni bo Amerika iteganya kwirukana; nk’uko imibare itangwa n’urwego rushinzwe abinjira n’abasohoka muri iki gihugu ibyerekana.
Politiki yo kwirukana abimukira baba muri Amerika iheruka gutangazwa na Perezida Donald Trump; ndetse iyi gahunda iri mu zihutirwa yatangaje ko agomba gushyira mu bikorwa ubwo yarahiraga ku wa 20 Mutarama.
Kuva Trump yafata ubutegetsi byibura muri Amerika hamaze gutabwa muri yombi abimukira barenga 3,500.
Kuri ubu Honduras ni yo iyoboye urutonde rw’ibihugu bifite abimukira Amerika iteganya kwirukana ku butaka bwayo (bararenga 261,000), igakurikirwa n’ibihugu birimo Guatemala ifite ababarirwa muri 253,000, Mexique ifite abarenga 252,000.
Ni mu gihe ibihugu nka Nicaragua, Cuba, Brésil, u Bushinwa, Ecuador, Colombia, u Buhinde na Peru buri gihugu gifite muri Amerika abimukira kuva hejuru ya 10,000 kugeza hejuru ya 40,000.
Usibye u Rwanda, ibindi bihugu bya Afurika bifite abimukira Amerika iteganya kwirukana birimo nka Kenya ifite abarenga 1,200, Tanzania (301), Uganda (393), Somalia (4,090), Sudani y’Epfo (136) u Burundi (462) na Congo-Brazzaville (795).
Birimo kandi Ethiopia ifite 1,713, Repubulika Iharanira Demokarasi ya Congo (1,068), Djibouti (29), Nigeria (3,690), Niger (642), Zimbabwe (545), Zambia (174), Togo (427), Tunisia (160) na Maro (495).
